尋京啟示

呢個星期剛睇完國際藝術展09，離開之際就追問一下匯演劇本進度，一如以往翡就岔開話題，同我講佢今朝睇左南京！南京！The City of Life & Death (我個人認為英文應該叫The City of DEATH就算，因為入面在生既人其實同死無分別)，好明顯呢個topic比匯演重要，咁我當下就即刻追問好唔好睇啦，點知阿翡俾左個完全唔襯佢既答案我，佢話：「身為一個中國人係應該要睇」。嘩！我當堂俾佢大左一下，心諗我咁問咪即係代表我遲過佢做一個中國人應該做既野？

所以我就克服左對黑白片同主題沈重既恐懼，入左去睇。

我曾經聽過電台有人話套戲其實都幾悶，佢話導演用一個紀錄片式既手法去拍呢套戲，搞到我有哂錯誤期待。套戲係紀實風格但絕對唔係紀錄片，而且仲有好多主觀鏡頭同藝術處理，最深刻既一個畫面係當日軍係第一個禮拜屠殺30萬人後，音樂換上振奮人心，鼓舞激昂調子，鏡頭就從後追上去一個腰纏武士刀既日本將領，如同一般電影用唻塑造英雄人物既技巧，係佢既背影之後，再放眼一望屍橫遍野既情景，好不震撼呀！陸川導演用左最簡單而又subtle既方法唻批評日軍既暴行；劇中幾條小人物線，有血有肉，有始有終，令我一路睇一路不禁問自己，如果自己生於當時會點做？會自尋短見？會苟且偷生？會出賣人定係願意俾人出賣？當然我諗男觀眾最想都係做劉燁個種短命英雄。

南京！南京！取材很恰到好處，遇上如此動盪既年代，的確無必要塑造英雄人物，因為一個人根本無可能比係南京發生緊既事重要，每個人其實都在找出路，無論是戲裏戲外，歷史還是現實，尋找過程都需要我們面對。而呢個正正係香港觀眾最需要既野。